A outra banda: about:invalid

Chámome Ramón

Nacín en 1979 e crieime en Cando (Outes, A Coruña). Traballei na editorial Toxosoutos, mais agora dedícome ao ensino secundario (imparto Lingua Galega e Literatura na Ghalisia profunda). Son membro do colectivo literario Sacou e da Asociación Cívico-cultural Terra de Outes. Publiquei tres libros de poesía: Orfeu en soños (Toxosoutos, 2005), Emily on the road (Acha Escrava, 2012) e Se pedra na brétema (Chan da Pólvora, 2017). Tamén teño escrito sobre a vida e a obra dos irmáns Añón: Francisco e Nicolasa. Colaborei no suplemento Artes & Letras Galicia, do diario ABC, e moi de vez en cando envío textos para a Axencia EFE. Desde que emprego tarxeta de crédito traballo para un importante banco.

Este é o meu blogue literario. Aquí asino como Claus Patera, personaxe da novela Die andere Seite (O outro lado), de Alfred Kubin. A tradución, algo forzada, deste título dálle nome ao blogue. "A outra banda" é tamén a expresión coa que denominamos a marxe oposta dun río, con relación ao espazo (a banda) que ocupamos. Somos dunha banda ou doutra segundo a perspectiva de quen enuncie.